കുടുംബ പ്രേക്ഷകര്‍ക്കൊപ്പം യുവപ്രേക്ഷകരും ഒരുപോലെ ഇഷ്ടപ്പെടുന്ന താരമാണ് മഞ്ജു വാര്യര്‍. മലയാളി പ്രേക്ഷകരുടെ സ്വന്തം ലേഡി സൂപ്പര്‍ സ്റ്റാർ. ഇപ്പോള്‍ സോഷ്യല്‍ മീഡിയയില്‍ വൈറലാകുന്നത് നടിയുടെ ഒരു സാഹസിക രംഗത്തിന്‍റെ വീഡിയോ ആണ്.
ഡ്യൂപ്പിന്‍റെ സഹായമില്ലാതെ സാഹസികത നിറഞ്ഞ രംഗം ചെയ്തിരിക്കുകയാണ് മഞ്ജു. നടിയുടെ ഏറ്റവും പുതിയ ചിത്രമായ ചതുര്‍മുഖത്തിന്‍റെ സക്‌സസ് സോംഗിലാണ് ഈ രംഗമുള്ളത്.രണ്ട് ചങ്ങലകളില്‍ തൂങ്ങി മുകളിലേക്ക് പൊങ്ങി മലക്കംമറിയുന്ന മഞ്ജുവിനെയാണ് വീഡിയോയില്‍ കാണുന്നത്.
ലേഡി സൂപ്പര്‍ സ്റ്റാറിന്‍റെ വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്. ചെറിയ ഫൈറ്റുകള്‍ സിനിമയില്‍ ചെയ്തിട്ടുണ്ടെങ്കിലും ഇതാദ്യമായിട്ടാണ് ഇത്രയും സാഹസികമായ രംഗം മഞ്ജു ചെയ്യുന്നത്. മഞ്ജുവിന്‍റെ സാഹസിക രംഗത്തോടൊപ്പം തന്നെ ചിത്രത്തിന്‍റെ സക്‌സസ് ഗാനവും സോഷ്യല്‍ മീഡിയയില്‍ വൈറലായിട്ടുണ്ട്.
വിധു പ്രതാപും മിഥുന്‍ അശോകനും ചേര്‍ന്നൊരുക്കിയ ഗാനം ആലപിച്ചിരിക്കുന്നത് വിധു പ്രതാപ് തന്നെയാണ്. കൂടാതെ ഗാനത്തിന്‍റെ റാപ്പ് വരികള്‍ ആലപിച്ചിരിക്കുന്നത് മലയാളി റാപ്പറായ ഇന്ദുലേഖ വാര്യരാണ്. മഞ്ജു വാര്യര്‍, സണ്ണി വെയ്ന്‍, അലന്‍സിയര്‍ എന്നിവര്‍ പ്രധാന വേഷത്തിലത്തുന്ന ചതുര്‍ മുഖത്തിന് മികച്ച പ്രേക്ഷക സ്വീകാര്യതയാണ് ലഭിച്ചിരിക്കുന്നത്.
മലയാളത്തിലെ ആദ്യ ടെക്നോ ഹൊറര്‍ ചിത്രമാണിത്. രഞ്ജിത്ത് കമല ശങ്കറും, സലീല്‍ വിയും ചേര്‍ന്നാണ് ചിത്രം സംവിധാനം ചെയ്തിരിക്കുന്നത്. അഭയകുമാര്‍, അനില്‍ കുര്യന്‍ എന്നിവരാണ് ചതുര്‍ മുഖത്തിന്‍റെ കഥ, തിരക്കഥ, സംഭാഷണം എന്നിവ രചിച്ചിരിക്കുന്നത്.
ജിസ് ടോംസ് മൂവിയുടെ ബാനറില്‍ മഞ്ജു വാര്യര്‍ പ്രൊഡക്ഷന്സും ജിസ് ടോംസും, ജസ്റ്റിന്‍ തോമസും ചേര്‍ന്നാണ് നിര്‍മിച്ചിരിക്കുന്നത്. ഈ വര്‍ഷം പുറത്തിറങ്ങുന്ന മഞ്ജുവിന്‍റെ രണ്ടാമത്തെ ചിത്രമാണിത്.
